Gedicht van Phil Schaeken

 

         Herfsgelök

 

Loupend vanaaf de paesjmanaesj

in werm gael zónleich

door de in bóntjgekleurde blaar

verkleide natuur

de Danikerboesj in

heuvel op, heuvel aaf

en langs de Gelaenbaek trök

puur herfsgelök !

 

Phil Schaeken

Nieuw gedicht van John Hertogh

bès ’s eerlik

doe vertèls ’t zo gemaekelik

euver waat-s te allenej kèns

euver waat-s te allemaol wits

euver waat-s te euveral deis

ich kèn alles

ich weit mee

waat ich neit allenej doon

eigelik

kèns te neit zoväöl

wits te toch mer wenig

deis te gaaroets niks

höbs te floep

zouws te ’t leifs

dich wied eweg versjtaeke

es te eerlik bès

160917©johnhertogh

Gedicht van John Hertogh

aafbraakpandj

 

baove wejt de sjaele wèndj

door vinster zónger roet

de raege vrit ‘t houtwerk weg

vaeg vruiger beelde oet

 

naeve sjotte sjtaon aw beelde

hie vuilt me weurd en ruuk me kleure

rös sjtraolt oet die aw kiekoete

zeen’ t ech gesjlaote deure ?

 

in ’t hoes versjtaeke zich

graw ratte van de óngergróndj

de nate kelder is verangerd in

ein grot vol vóch en sjtróntj.

 

achter glaas sjtaon óngewesje

pöt en panne, sjere, metser

d’awwe apothekersflesje

zeen verdwene mer wo haer ?

 

aug2017©johnhertogh

Gedicht van Phil Schaeken

 Van Monnickendam nao Marken

 

Oppe fits, hoog op d’n diek

door ’t waterlandj

róndjóm wolkepartieje van Ruisdael

de wèndj langs mien wange

en wied, gans wied kieke euver ’t vlake landj.

Ein zilvermeeuw kriesjend euver miene kop

en kiek……. eine kievit, sjpitsig sjmaal

ballètterig tössje hoog graas

dao, vieftig witte zjwane, nae mee, oppe Gouwzee

e sjtillaeve in augustus.

Griesgruin water wiebelt weg, weg van mien ouge

richting Marken, en wiejerweg richting Volendam

eine boot zeilt zjweverig oet mien gezich

ich heur e gedich óm mich bie

ich zeen ein sjilderie en aom de lóch in, gans deip

hie, hoog op d’n diek, door ’t waterlandj.

                                                                              Phil Schaeken

Zonsopgang

Als de nacht stilletjes verdwijnt en in het oosten de hemel rood/ roze kleurt,

als de vogels hun ochtendconcert geven,

als de hanen kraaien

en de duiven koeren

als de koeien loeien

en de lucht zo zuiver en zo puur is

en het hooi zo landelijk ruikt

om dan te mogen zien hoe de zon als een schijfje boven de horizon tevoorschijn komt

dat is voor mij een geschenk

dan voel ik me dankbaar dat ik weer aan een nieuwe dag mag beginnen.

José Van Havere